Rodūšuos raksteišonys darbneicā Rēzeknē, izmontojūt “Loesje” tehniku, tuos dalinīkim beja vareiba īpasazeit ar “Loesje” plakatu veiduošonys kusteibu, tuos vierteibom, pīsadaleit vairuokūs rodūšuos raksteišonys īsasiļdeišonys aizdavumūs, kai ari pošim radeit saukļus, kas niu ir tykuši par vysim apsaveramim plakatim.
Storptautyskuo organizaceja “Loesje” rodusēs 1983. godā Nederlandē, bet niu tei puorstuovāta vaira nakai 25 pasauļa vaļstīs i vaira nakai 15 godu – nu 2006. gods – ari Latvejā, tok viņ niu iz darbeibu, puordūmom voi pasmaideišonu aicynojūšī plakati ir ari latgaliski. Nu darbneicys Rēzeknē topušūs tekstu par plakatim puorsavārtuši vasali 22 i tī aicynoj padūmuot ap volūdu, ap kasdīnys dzeivi, kai ari ap situaceju pasaulī.
Plakatu tekstu darbneica ir vīns nu spēlis “Latgalīšu volūdai draudzeiga vīta – ite Rēzekne!” pasuokumu, sovpus spēle ir akcejis “Latgalīšu volūdai draudzeiga vīta” aktivitate. Akcejis, kuru eistynoj latgalīšu kulturys kusteiba “Volūda” i portals lakuga.lv, mierkis ir rūsynuot kasdīnys saziņā vaira izmontuot latgalīšu volūdu, kai ari veicynuot sabīdreibys izpratni par latgalīšu volūdys vierteibu i radeit pozitivu attīksmi pret tū. Akcejis dalinīkus var atpazeit piec eipašu uzleimu ar tekstu “Latgalīšu volūdai draudzeiga vīta”. Vaira dazynuošonai par akceju ite: lakuga.lv/ltg-vita/.
Latgalīšu kulturys kusteiba “Volūda” (bīdreiba “LgSC” (pyrma tuo “Latgolys Studentu centrs”)) ir navaļstiska organizaceja, kas dybynuota 2005. godā i apvīnoj cylvākus, kurim ir svareigi byut aktivim, radeit i vierzeit arviņ jaunys iniciativys i dorbus latgaliskuos kulturtelpys i jo eipaši latgalīšu volūdys atteisteišonai, padareišonai vysaiduokai i īkustynuošonai. Kusteiba ir vīna nu senejuokūs i nūzeimeiguokūs myusu dīnu latgaliskuos kultuvidis organizaceju.
Spēle i cytys “Latgalīšu volūdai draudzeiga vīta – ite Rēzekne!” aktivitatis teik taiseitys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozūs kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
Vaira dazynuošonai: voluda.lv, lgsc.lv i lakuga.lv
