Rēzeknis Tehnologeju akademejā piļneigoj humanitarūs zineibu digitalūs resursus

Otrdiena, 12. janvāris
Rēzeknis Tehnologeju akademeja kūpdarbeibā ar ostonim partnerim 2020. gods oktobrī suoce īdzeivynuot projektu „Humanitarūs zineibu digitalī resursi: integraceja i atteisteiba”. Par div godi planavuots izpiļdeit aizdavumus, kurī mudrynuos Latvejā radeitūs humanitarūs zineibu resursu tuoļuoku raisteibu, pazeistameibu i plotuoku izlītuojumu.

RTA dorba grupa seviški dasagrīzs škārsteiklā daīmamūs latgalīšu volūdys korpusu myuslaiceiguošonai. Projekta koordinatore Sanita Martena stuosta: „Pyrmais latgaliskūs tekstu korpuss pasataiseja 2007.–2013. godā kai daļa nu Latvejis-Lītovys škārsrūbežu kūpdarbeibys projekta. Pa šai dīnai itys korpuss ar pasauku „MuLa-01“ irā zeimeigs resurss myuslaiku latgalīšu volūdys tiemiešonā: jis apkūpoj nu 1987. da 2012. godam latgaliski publicātūs tekstus i apjam 1 miļjonu vuordformu. Vys tik pa myuslaiku korpuslingvistikys mārim itys skaits na cīši lels, bez tuo „MuLa-01“ tekstūs redzīs pareizraksteibys i morfologejis variantu raibums. Myusu tānejuo projekta aizdavums – pa pyrmam, papiļdeit itū korpusu ar latgaliskim tekstim, publicātim piec 2012. gods, i likt izsvoru iz tim dorbim, kurī dasatur pi 2007. godā apstyprynuotūs nūsacejumu. Itei korpusa daļa byus dyžan svareiga, raistūt tuoluokūs tehnologiskūs volūdys reikus – klaidgivus (spell-checkers), volūdys daļu markerus, morfologiskūs analizatorus i tt. Pa ūtram, kluot pi raksteitūs tekstu korpusa planavojam sastateit runys korpusu, kurs atspeidynuos vysaidu vacuma grupu latgalīšu runojamū volūdu, īskaitūt juos regionaluos i funkcionaluos sovpateibys. Poši īraksteisim i transkribēsim jaunu materialu, a sūpluok tam izlītuosim i agruokūs aizrokstus, kurī jau sakūpuoti dašamejūs RTA pīsadaleitajūs projektūs. I vēļ, pa RTA studenta A. Kūceņa iniciativai runys korpusā īslēgsim Reitu diasporā – Sibirī i Pliskovys apgabalī – dzeivojūšūs latgalīšu runys tekstus.”

Sūpluok pošim korpusim i ziniskajim rokstim pa jūs lītuošonys temai projekta dorba grupa sataiseis apvuiceibys videokinys, kuramuos īpazeistynuos ar korpusu dūtajom vareibom. Taidā ceļā augs školuotuoju i škoļnīku saprasme ap tū, kai humanitarūs zineibu digitalī resursi var jim paleidzēt kasdīnā.

Paļdis Armandam Kūceņam par teksta puorlikšonu latgalīšu volūdā!

         

 

 



Rēzeknes Tehnoloģiju akadēmija © Atbrīvošanas aleja 115, Rēzekne, Latvija. Tālrunis: 28325368; RTA paziņojums par personas datu apstrādi.
Jautājumus un ierosinājumus sūtiet izmantojot RTA palīdzības dienestu