Autorizēties   |   Reģistrēties

Alise Breinumu zemē

Pirmdiena, 30. Novembris
Gluži kai Alise sovu ceļojumu uzsouca pa truša olu, tai Riezeknis Augstškolys (RA) komanda ir uzsoukuse Luisa Kerola gruomotys „Alise Breinumu zemē” prezentacejis pa Latgolys nūvoda školom. Kas ir eipašs šai gruomotā? Rodīs, ka gondreiž voi kotrs bārns Alisi atguodoj nu sovys bierneibys, tikai reši kurš ir itū gruomotu patīšam ari izlasejs.

Deļ kam tai? Partū ka gruomota ir vaira dūmuota leluokim bārnim, partū, ka jimā ir cīži daudz apraksteitysdūmuojamūs lītu. Nu lyuk! I lai ituos dūmuojamuos lītys byutu vīgluok saprūtamys, gruomotys nūdaļu beigous ir kaitys – spielis, kurys spielejamys ar draugim, vacuokim ci školuotojim, nu – ar tim cylvākim, ar kurim ir kūpā skaiteita gruomota.

Partū arī RA komanda itū gruomotu īsouk skaiteit kūpā ar školānim. 13. septembrī RA beja gruomotys atvieršonys svātki. Losūt lūmuos nūdaļu no gruomotys, Ilga Šuplinska (gruomotas redaktore)– teiciejs i Susurs, Evika Muizniece (tulkuotuoja)– Alise, Valentins Lukaševičs (volūdas konsultants)– Capurnīks i Sandra Ūdre (korektore)– Marta Začs, paruodieja Alisis pīdzeivuojumus interesentim.

Sovkuort, 19. novembrī mes bejom gostūs Ruguoju nūvoda Eglainis pamatškolā i Ruguoju vydsškolā. Dīna beja sasamuokuse i pa druskai smydzynuoja, piecsvātku laiks, kod ir īsastuojs drupeit atsluobums. Īejūt Eglainis pamatškolā, dzydrs – labrīt – myus sagaideja nu vysom pusem, bārni prīcuojās, ka ir īsaroduši gosti. Tys nūzeimoja, ka vīna stuņde dažom klasem nanūtiks, jo jī pīsadalēs Alisis prezentacejā. A tū, ka školys bārnam nanūteikuša stuņde ir kai madus maize, mes vysi pīminim nu sova školys laika.

Tai kai Alisis veiduotuoju komanda nabeja pylnā sastuovā, Capurnīka lūmu prezentacejā pīškiera atveiduot maņ, i maņ vajadzēja mudrai saprast, kas ņui byus doroms.Piec nalela apjukuma breiža, es laseju Capurnīka tekstu nu sadalis „Trokuo čaja dzeršanona” i piļneibā pazudu Alisis gruomotā. Laiks paskrēja dreizai, i varēja suoktīs spēļu daļa. Ilga Šuplinka bārnus izvaicavuo par laiku i laika nūzeimeibu kotra dzeivē, voi laiku var nūsist, i kai tū dora? I voi vysod tys, kas nu molys izaver kai laika nūsisšona, patīšom taids ari ir? Vēl dažis spielis i leidzeigā pasauokumā jau sasatykom ar Ruguoju vydsškolys školānim: http://studija.ru.lv/categories.php?cat_id=483&sessionid=2a015b3505e593d28b08d4be78e54c74

27. novembrī es varāju Alisis prezentaceju pasavērt otkon, šūreizAndrejdīnys pasuokumā. Naz par kū ītū reizi tei lasiejuma daļa man ruodejuos garuoka? I beigu dagaidiet nabeja tik vīglai? Te ir ari atbiļe iz tū, kai skaiteit itū gruomotu? – Nūteikti kūpā ar kaidu, i lūmuos, jo taidā veidā nazyud uzmaneiba. I trenejās arī laseitprasme. Sovkuort, spieļu daļa beja interesantuoka partū, ka kaituos tika īsaisteiti ari školuotuoji i pīaugušī, kuri beja atbraukuši leidza bārnim iz pasuokuma „Muna sāta, škola, pogosts/piļsāta 1917.–2015. godi” nūslāgumu.

Ja gribi, lai ari Tovā školā voi pogostā īsarūn Alise, sasazynoj ar RA pa teļeponu 26656553 ci e-postu: san@ru.lv. I par laika nūsisšonu vysmoz vīnys vuiceibu stuņdis garumā varēsi aizmierst!

Meldra Gailāne,

akademiskuos bakalaura programys “Filologeja” 1. kursa studente



Rēzeknes Tehnoloģiju akadēmija, 2016 © Atbrīvošanas aleja 115, Rēzekne, Latvija. Tālrunis: 28325368;
Jautājumus un ierosinājumus sūtiet izmantojot RTA palīdzības dienestu