Autorizēties   |   Reģistrēties

Sīvīte, dzeja i stuosti: izīs jauna gruomota latgaliski

Trešdiena, 2. Oktobris
Bīdreiba „Hronologeja” izdūd latgalīšu jaunuos dzejneicys Ligijis Purinašys debeja kruojumu „Sīvīte”. Dzejis kruojumā apkūpuoti vaira kai 80 teksti, kas topuši apmāram pīcu godu laikā. Gruomota izdūta ar Latgolys regiona atteisteibys agenturys, Vaļsts Kulturkapitala fonda i akceju sabīdreibys „Latvijas Valsts meži” atbolstu.

„Sovulaik raksteišonai latgaliski mani pīvērse literats i literaturzynuotnīks Valentins Lukaševičs. Leidz tam par tekstim latgaliski nimoz i naaizadūmuoju. Īīt latgalīšu kulturys vidē deļ manim beja nazkas satraucūšs, raksteit latgaliski – absoluta uzadrūsynuošona,” stuosta Ligija.

Dzejis kruojums „Sīvīte” aktualizej sīvītis seikstumu, šerpumu, dzeivis prīcu i bādys, vysu tū, kas ir juoiznas iz placu, kab atrostu laimi voi vysmoz koč kaidu īkšeju stabilitati. Ligija atkluoj – gruomota ir veļtejums vysom stypruom sīvītem. Gon tom, kas bejušys pyrma juos, gon babu i mamys paaudzem, gon tom, kas ir sūpluok: sābrūs, dorbā, draugu vydā. Tū ari paruoda gruomotys ilustracejis, kuru autore ir Ilze Gailāne. Pi dzejis kruojuma „Sīvīte” struoduojušys ari Ilze Sperga i Laura Melne.

„Latgolys sīvītei jau 20. godu symts beja smogs: kari pajēme veirus i dālus, saimisteiba beja iz pošu sīvīšu smolkūs placu, vysaidys varys i laiki guoja puori. Te dzeive vysod ir bejuse drupeit cytaižuoka. Varbyut skorbuoka kai puornūvodneicom – vaira dorba bejs, bet vaira ari dvieseliskuo, spieceiguo. Ruodīs, tū ari paruoda Ligijis teksti,” soka bīdreibys „Hronologeja” vadeituojs viesturnīks Kaspars Strods.

Gruomotys attaiseišonys svātki paradzāti 25.oktobrī 16.00 Rēzeknē, Latgolys Kulturviesturis muzejā, i 8. novembrī 18.00 Reigā, barā „Coco Loco”.  Iz prezentacejom eipaši gaideiti ir Latgolys regiona biblioteku puorstuovi!

Sekuot leidza jaunumim par gruomotu i stuostim par Latgolys sīvītem var socialajūs teiklūs Instagram (@siiviite_woman) i Facebook (Sīvīte).

Bīdreiba „Hronologeja”

 

Vaira informacejis:
Ligija
29205413
ligija.purinasa@gmail.com



Rēzeknes Tehnoloģiju akadēmija, 2016 © Atbrīvošanas aleja 115, Rēzekne, Latvija. Tālrunis: 28325368;
Jautājumus un ierosinājumus sūtiet uz helpdesk@rta.lv