RTA nūtiks Kārļa Skalbes puorsokys „Kaķīša dzirnavas” puorlykuma latgaliski „KAČEIŠA PATMALIS” prezentaceja

Piektdiena, 24. novembris, 2017
30. novembrī 14.00 Rēzeknis Tehnologeju akademejis aktu zalē byus vareiba tiktīs ar Kārļa Skalbis puorsokys „Kaķīša dzirnavas” veiduotuojim i izdeviejim, kai ari īsaguoduot gruomotu breineigai Zīmyssvātku nūskaņu duovonai.

Pasateicūt Marutys Latkovskys i muokslineicys Ievys Jurjānis sadarbeibai, kas aizasuoce kai Ievys interese par latgalīšu volūdu i kulturu, ir izguojs breineigs kūpdorbs Kārļa Skalbis puorsoku styla cīneituojim, dūmuotuojim par latgalīšu volūdys byušonu i izdzeivuošonu jaunuokajuos paaudzēs i vīnkuorši muokslys baudeituojim. Partū ka prīcuotīs varēs gon tī, kas dzierd latgalīšu volūdys skaneigumu, gon tī kas meklej stabilys muokslys vierteibys. Ievys Jurjānis zeimiejumi īvad skaistā dzeivis i sapynu savejumā, bet Marutys Latkovskys volūda atgrīž pi sakņu.

Kūpdorbs nabyutu tik dreiži sasnīdzs plotuokys auditorejis, ka na izdevnīceibys „Latvijas Mediji” dzierdeigūs aušu i Latgalīšu kulturys bīdreibys nalela finansiala atspaida.

Gruomotys verseja latvīšu literarajā volūdā jau sateik sovu skaiteituoju, kai sovā viestejumā skaiteituojim nūruoda izdevnīceiba „Latvijas Mediji”: Itei Kārļa Skalbis puorsoka ir izcyls muokslys dorbs, kas nav par vaidiešonu i žāluošonūs. Tys ir stuosts par kačeiti, kurs izstaigoj gryutū dzeivis ceļu navys prosūt, bet dūdūt. 2014.godā itei gruomota tyka atzeita par mīluokū bārnu gruomotu Latvejā. Atbolstūt dūmu par latgalīšu rokstu volūdys vuiceišonu školuos i vuiceibu leidzekļu izstruodi, „Latvijas Mediji” itū puorsoku izdūd ari latgaliski.

 Sevkurs interesents aicynuots byut kluot gruomotys pyrmskaitejuma dīnā.

                                                                                                Ilga Šuplinska,

                                                                                    Latgalīšu kulturys bīdreiba



Rēzeknes Tehnoloģiju akadēmija © Atbrīvošanas aleja 115, Rēzekne, Latvija. Tālrunis: 28325368; RTA paziņojums par personas datu apstrādi.