Dīnys nūmetne pusaudžim „Sūpluok”

Svētdiena, 10. Jūnijs
Latgalīšu kulturys bīdreiba (LKB) ir pīsadalejuse daudzu kulturys pasuokumu reikuošonā, tymā skaitā četru pasauļa latgalīšu saītu organiziešonā, atbaļstejuse školuotuoju vosorys kursu-nūmetnis „Vosoruošona” nūrisi, pīsadolūt kai lektori voi pasuokumu dalinīki. Latvejis vaļsts symtgadis godā LKB grib radeit jaunu tradiceju – bārnu i pusaudžu nūmetņu reikuošonā. „Sūpluok” ar nūmetnis dalinīkim izdzeivojūt latviski latgaliskuos vierteibys, styprynūt teritorialuos i nacionaluos pīdereibys apziņu.

Nūmetne nūtiks nu 6. leidz 17. augustam (dorba dīnuos pļkst.8.30–16.30) Rēzeknis Tehnologeju akademijis (RTA) telpuos. Nūmetnis vadeituoja – Lolita Kivleniece-Kuzņecova, nūmetnis nūdarbeibys nūdrūšynuos muzykanti: Ēriks Zeps i Sovvaļnīks, literāte i dramys terapeite Līga Rundāne, literate i TV žurnāliste Evika Muizniece (Karonhisake), fotografs i dizaina speciālists Māris Justs, latgaliskūs izdavumu i pasuokumu veiduotuoja Ilga Šuplinska.

Nūmetnē teik gaideiti 30 aktivi pusaudži (10–14 godi), kam “acs dag” pošam radeit muzyku voi literaru tekstu, paraudzeit spēlēt kaidu muzykys instrumentu voi izgleituojūšu datorspēli, pošam izdūmuot ari spēli voi puorsoku, atsapyust kuoju prīcys voi folkzumbys nūdarbeibā, dazynuot vaira par latgalīšu vierteibom i symbolim, veiduot sovu imidžu.

Nūmetnē byus vareiba runuot i dūmuot latgaliski i sevkurā cytā volūdā, kurā izateikt ārtuok i radūšuok, byus divi pasuokumi, iz kurim aicynuosim daleibai ari cytus školānus: 11. augustā latgaliskuo „Večerynka” i 17. augustā animacejis filmu/-ys Muna Latveja” prezentaceju. Nui, raudzeisim saprast, kas vajadzeigs, kab kina byutu. Byusim prīceigi, ka bārnu vacuoki atbaļsteis atsevišķus pasuokumus i pīsadaleis kaidā nu publiskajim pasuokumim voi vysmoz nūmetnis nūslāgumā ar latgaliskūs tradiceju improvizacejom Nakts stygā.

Ka gribi īsasaisteit, tod leidz 20. juņam aizpildi anketu pusaudžu nūmetnis „Sūpluok” FB lopā. Esi viereigs: ir nūmetnis leidzmoksuojums.

Nūmetni organizej LKB sadarbeibā ar RTA, nūmetni finansiali atbolsta RTA i Latgolys kulturys programys projekts „Dienas nometne pusaudžiem „Sūpluok””.

Nūmetnis īviržu raksturuojums

 Sarunys par latgaliskū i aktualū (I.Šuplinska)

Pamatā spēle “Īsapazeisim” (http://iepazisimies.rta.lv). Sarunys par O. Kūkuoju i mīlesteibu, O. Slišānu i patriotismu, J. Tiņanovu i kino, O. Rupaini i humoru, M. Andžāni i kruosom, Naaizmērstuli i pučem, E. Gudrineicu i skaitlim, K. Raudivi i nabyušonu…

 Rūku darbeibys prīca (L. Kivleniece-Kuzņecova)

Nūdarbeibys praktyskais darbeņš byus saisteits ar runojamū (sarunu) temu. O. Kūkuoja mīlesteibai taps sirsnenis, Tiņanova kino papyldynuosim ar origami tālim, M. Andžānis stuostu par kruosom saisteisim ar kruosu pludynuojumim, Naaizmērstulei – zīdi i.c.

 Kuoju aktivitatis prīca (I.Šuplinska, I. Gusāns)

Raudzeisim sūpluok izskrīt, izsist i sagiut jaunys i vacys spēlis (kaitys).

 Kina byus! (E.Muizniece, M.Justs)

Kas vajadzeigs, kab taptu animacejis filma? Kaids byus saturs? Kaidi ir paraugi? Kaids byus kotra viestejums? Kaidus materialus i tehnikys izmontuosim?

 Animacejis filmys saturs i tehnika (E.Muizniece, M.Justs)

Animacejis filma “Muna Latveja” – idejis i salykums.

 Kū tei drama par mani var pasceit? (L.Rundāne)

Dažaidi vyngrynuojumi i naleli praktiski aizdavumi, sarunys par sevis izzynuošonu ar dramys paleidzeibu.

Tu saprassi, cik dažaidys ir emocejis, cik lels ir jūs spāks: kur likt dusmys i kai izsaceit prīcu.

 Inscinejam puorsoku! (L.Rundāne)

Caur puorsoku tālim īpazeistam sevi i muokslys metaforiskumu, simboliskumu. Gatavojam puorsteigumus nūmetnis nūslāgumam.

Tu variesi izdūmuot sovu puorsoku i sovus varūņus, sovu puorsoku pasauli, i variesi kūpā ar cytim daleibnīkim izspielēt jūs puorsokys, bet kūpā ar vysim izruodeisim sovu kūpeigū puorsoku.

 Vizualuo tāla veiduošona (E.Muizniece)

Nūdarbeiba puorlīceibys i sova tāla (imidža) izkūpšonai. Atbylstūšys kruosys, formys i nūsacejumi, kai i kū lobuok likt kūpā, kab izcaltu sovys stypruos pusis.

 Izrokstam sevi tekstūs i muzykā (E.Muizniece, Ē.Zeps L.Kivleniece-Kuzņecova)

Meklejam žanru, stylu, kas pasadūd sevs izteikšonai ar vuordu voi skonu. Saceram i interpretējam, veramīs dažaidus tekstu i muzykys izteiksmis veidus.

 Etnomuzyka i es (Ē.Zeps)

Ka varim, spielejom dažaidus instrumentus kūpā. Paraugam vysi, raugam sagaršuot tautys muzykys spāku i nūslāpumus.

 Folkzumba (E.Muizniece)

Eksperimentejam i meklejom sovu vingruošonys i deju rytmu.

 Dīdžeja kasdīna i dažaidi muzykys styli (I.Gusāns)

Raugam dazynuot dīdžeja leksiku, imidžu, kaidi muzykys stili dažaidūs viesturiskūs laikūs i atškireigūs emocionalūs nūskaņojumūs ir radušīs. Gatavojam muzyku i dīdžeja “fiškys” večerynkai 11.augustā.

 Nakts styga (ar vacuokim)

Pīdzeivuojumu spēle – kaidys latgaliskuos tradicejis es zynu i svynu.

Nometnes līdzmaksājums ir 90,00 EUR (tajā iekļaujot ēdināšanu, medicīnas personāla pakalpojumus, ekskursijas transportu). NB! Ja dzīvo ārpus Rēzeknes, ir iespējama atlaide līdzmaksājumam! Nometnes līdzmaksājums jāsedz līdz 20. jūlijam.

VĪTU SKAITS ĪRŪBEŽUOTS

                                                                     

Ilga Šuplinska,

 projekta vadeituoja



Rēzeknes Tehnoloģiju akadēmija, 2016 © Atbrīvošanas aleja 115, Rēzekne, Latvija. Tālrunis: 28325368;
Jautājumus un ierosinājumus sūtiet uz helpdesk@rta.lv